Í september árið 2000, í upphafi nýs árþúsunds, sameinuðust leiðtogar heims í höfuðstöðvum Sameinuðu þjóðanna í New York og samþykktu Þúsaldaryfirlýsingu Sameinuðu þjóðanna. Í yfirlýsingunni var ákveðið að stuðla að bættum hag mannkyns um allan heim á sviði þróunar, fátæktar, öryggis, friðar, umhverfisverndar, mannréttinda og lýðræðis.
Átta markmið voru skilgreind sem eiga að stuðla að mannsæmandi og sjálfbærri framtíð fyrir alla íbúa heims. Markmiðin eru tímasett og á mælanlegur árangur að nást fyrir árið 2015. Ef heldur fram sem horfir munu markmiðin fyrst nást eftir 110 ár.
Jafnvel þótt SÞ hafi sett sér umrædd markmið árið 2000 og þó svo margir vinni eftir þeim þá eru þau ekki kunn meðal almennings. Samkvæmt könnun Eurobarometer, sem gerir reglulega kannanir í ríkjum Evrópusambandsins, vita færri en 10% Evrópubúa hvað felst í markmiðunum. 80% Evrópubúa höfðu ekki svo mikið sem heyrt um 2015–markmiðin árið 2007.
Vefsíðan www.2015.is er liður í íslenskri upplýsingaherferð sem Félag Sameinuðu þjóðanna á Íslandi hrindir af stað vegna 2015–markmiðanna [Þúsaldarmarkmiðanna] eins og vísað mun verða til þeirra á þessari síðu. Eitt af markmiðum félagsins er að samræma starf þeirra félagssamtaka sem leggja vilja því lið að hrinda hugsjónum Sameinuðu þjóðanna í framkvæmd. Upplýstur almenningur er nauðsynlegur grunnur að framgangi 2015–markmiðanna.
Við ætlum að
1. Eyða fátækt og hungri
2. Tryggja að öll börn njóti grunnskólamenntunar
3. Vinna að jafnrétti kynjanna og styrkja frumkvæðisrétt kvenna
4. Lækka dánartíðni barna
5. Vinna að bættu heilsufari kvenna
6. Berjast gegn alnæmi, malaríu og öðrum sjúkdómum sem ógna mannkyninu
7. Vinna að sjálfbærri þróun
8. Styrkja hnattræna samvinnu um þróun
Lestu meira um 2015–markmiðin
|
